終於可以用Google音樂下載啦~~

　　前一排，聽講Google可以免費下載正版音樂，好開心，於是上Google，發現真係有Google音樂下載！但呢個試聽同下載服務僅對中國大陸境內提供。

　　但係好失望，我一點下載就彈出個網頁話 “403 forbidden”，頂！我本來就係大陸境內，冇理由唔得咖？！開始我以為係瀏覽器嘅安全選項問題，於是我將D防火牆啊、安全選項啊全部關晒，但係都唔得，搞左幾日，上網抄左幾日都冇見到有講呢個問題，無法子啦，只好唔搞~~

　　後尾翻到公司，啱好見到個同事用Google音樂聽緊歌，我以為係公司可以，於是嗱嗱臨開機試下，點知又係唔得，甘就出奇啦，我地公司係用一個IP出口嘅，冇理由，佢得我唔得咖？！於是我比較左下我台機同同事台機有乜唔同，比較之下先發現，佢個DNS同我個DNS唔一樣，改左個DNS之後，掂晒！！終於可以下載啦！

　　因為我用開嘅係 OpenDNS，所以所有我用嘅機都會設置個DNS為OpenDNS 嘅地址，估計係中國境內 Google 音樂下載網址解釋僅對中國境內DNS有效，所以在國際DNS服務器內解釋呢個地址到其它位置，於是通過OpenDNS解釋到其它嘅IP導致出現 forbidden 嘅現象。

點解要點解?

　　記得係大學果陣，有一次有個課程設計要做一個C語言嘅詞法解釋器。

　　果陣起左個念頭想做一個通用嘅語言編譯器，即係一個萬能既語言編譯器，類似於C語言編譯器、Pascal編譯器等等，但係唔需要硬性為每個語言寫程式（GCC就係呢類型嘅實作），只需要寫一個簡單嘅詞法語法配置文本文檔即可以支持編譯出不同平台嘅程式（二進制文件格式）。

　　後來同老師講左下自己嘅諗法同埋一D唔成熟嘅思路，同埋打算用幾十年時間嚟做呢樣嘢。

　　老師同我講（大概意思）：「呢種編譯器到目前都未出現，起碼證明呢樣嘢難度好高或者幾乎唔可能實現，點解要做呢D無用功呢？何況你做咗出嚟，佢又有乜價值呢？又有乜市場呢？何況做通用嘅編譯器你嘅編譯速度就自然比特定嘅編譯器速度慢，甘你呢個編譯器又有乜用呢？」

　　聽到老師甘講，有D愕然，講真啦，老師講得係啱，但係……我只係想做呢樣嘢，無話想攞佢嚟用，只係想做，點解一定要有用、一定要有價值、一定要有市場啫？就好似細路嘅玩具咁，只係因為有興趣，想玩就玩啫，當時亦係甘回答嘅。

　　人嘅一生，短短百年，雖則現實一分錢可以逼死英雄漢，但我覺得人一世物一世，樣樣事情都講錢、講有用、講意義未免太無意思啦，更有意思嘅事情例如靜靜的聽一首歌、諗辦法實現一個自己諗法嘅程式、嘗試一個月坐看夕陽西下、學習一下道家無為之法……人死如燈滅，生前嘅一切名聲、金錢、榮譽、利欲終將歸於塵土，千百年後或許無人知道你、或許有人知道你，又如何？一切不過碌碌，重不如趁住生命尚存做D自己鍾意嘅事情。遊戲人間亦係個唔錯的人生態度。

　　好彩一直堅持自己選擇自己嘅道路，而家做嘅係自己喜歡嘅編程工作，雖然唔係做自己最鍾意嘅遊戲引擎，但只要係寫程式我就好開心啦，何況而家通常寫嘅系嵌入式程式同埋驅動程式，都系自己鍾意做嘅部分，而家好開心~~~

Linux or ReactOS ?

　　用左 Linux 嚟做開發有一段時間，慢慢發覺，Linux 原來面對嘅用戶群應該喺程式撰寫員先至啱 =_=b

　　剛開始用 Ubuntu 時，諗住佢好似 Windows 咁樣好容易上手嘅，點知到喺使用嘅過程中遇到好多奇奇怪怪嘅問題，Google 之後，先知道又翻到石器時代，大多數問題唔可以通過 GUI 嚟解決，基本上呢D問題都要直接喺命令行底下解決，或者需要從某D源代碼重新編譯安裝，慢慢咁，到最後，習慣左連GUI都唔用，只用命令行。講真啦，都喺鍾意乜嘢都用鼠標喺各個GUI裡面跳來跳去呢種直觀嘅方式嚟解決問題 -_-|||

　　直到上年年尾，發現左一個好玩嘅 OS —— ReactOS，佢哋既目標似乎喺要做一個開源板嘅 Windows NT 內核 OS！哇哈哈，全部繼承左 Windows 系列嘅操作方式，而且完全兼容 Windows NT 及以上 OS 嘅軟體同埋驅動程式！！特別喺驅動程式，雖然話有唔少硬體開始有 Linux 嘅驅動程式并且有成班人喺喥開發支持舊硬體嘅驅動程式，但仲喺有唔少廠商為左方便只開發 Windows 平台嘅驅動程式，咁樣如果你買左果D硬體，你焗住只能喺 Windows 下用啦。

　　下載左個 ReactOS 嚟玩左一下，發覺佢已經可以跑起身，同個 Windows 2000 好鬼似。可以開一D類似於 FireFox 2.0 之類嘅軟件，只喺佢仲處於非常唔穩定嘅開發程度，經常郁下就死機藍屏。不過佢哋嘅開發進度好快，睇左下，平均每日有成十個修改提交，唔知幾時可以真正進入實用嘅階段呢，真喺好期待！

　　比較 Linux 同埋 ReactOS，我覺得 ReactOS 嘅理念會更有前景，畢竟好多公司或者家庭購買左嘅軟體硬體都只能用喺 Windows 上，如果可以直接轉到呢個 ReactOS 上，買左新機後，就可以慳翻筆買 OS 嘅錢，畢竟叫個個都轉到 Linux 底下確實系有難度，特別喺遇著好似我大姐夫D甘嘅人，用 Windows 只會點鼠標，又唔願學新嘢，叫佢去用 Linux 估計同儸佢條命差唔多……

　　Linux？唉，如果界面嘅易用性同埋速度可以提高上去，估計可以搶到 Windows 平台部分做開發嘅人員、願意嚐新的人同埋打算慳成本而進行平台轉換嘅團體。